Unha viaxeira con acento inglés

Imaxe da nosa protagonista, Gaivota escura (Larus fuscus) adulta, levaba unha anela plástica (non se deixou fotografar fora da auga), coa seguinte codificación 0;AZ[DHC]↑/0;α. Anelada por Peter Stewart en Gloucester, Gloucestershire (Reino Unido/UK) en maio do ano 2008.

Desprazamento de 0;AZ[DHC]↑/0;α dende a súa localidade de anelamento en Reino Unido ata Figueira da Foz, Coimbra, Portugal (novembro 2008, H.V.) (trazo amarelo). Desprazamento dende Figueira da Foz ata Pinto, Madrid, Spain (xaneiro 2009, M.J.) e retorno á colonia de cría en Reino Unido (marzo 2009, J.D.S.), por último, movemento dende a colonia de cría ata a praia de San Cibrán (outubro 2009, A.P.B.) (trazo vermello). Sumando os quilómetros recorridos por esta Gaivota… (1395 Km + 447 Km. + 1285 Km. + 1158 Km.) obtemos unha nada desprezable suma de 4.285 Km.

Agora só queda agardar, que realice a mesma ruta que o inverno pasado, polo que deberemos estar atentos os compañeiros de Madrid (Miguel Juan, Juan Ruiz, Javier Marchamalo, Oscar Frías e Delfín González) e o seu blogue Madrid Gull Team.

Un saúdo.

Praia de San Cibrán

Hoxe visitei a praia de San Cibrán (Ría de Aldán), enorme concentración de Láridos, sobre uns 1000-1500 exemplares (incluíndo a praia veciña de Vilariño). En total 6 especies: 800 exemplares de Gaivota patiamarela (Larus michahellis); 2 aneis plásticos, 250 exemplares de Gaivota escura (Larus fuscus); 4 anelas plásticas, 3 exemplares (2 adultos inverno e un 1º inverno) de Gaivota cabecinegra (Larus melanocephalus); 1 anela plástica, 20 exemplares de Gaivota chorona (Larus ridibundus), 3 exemplares (2 adultos e un 1º inverno) de Gaivotón (Larus marinus), e por último 1 exemplar adulto de Gaivota arxéntea (Larus argentatus).

Na imaxe superior, situación da praia de San Cibrán (Península de O Morrazo).

Desgraciadamente non teño fotos de todas as anelas, moita saturación:

Comezo con este invernante habitual da praia, acompañado en primeiro termo por un dos adultos de Gaivotón (Larus marinus), 0;α/0;V[ZATT]↓ Gaivota patiamarela (Larus michahellis) adulta. Anelada en xullo do ano 2000 en Monte Agudo, Illas Cíes por Rafael Costas e Alberto Pastoriza Barreiro (ANDURIÑA).

Gaivota escura (Larus fuscus) con plumaxe de 2º inverno, 0;α/0;AZ[HC.AW]↑. Anelada por Eric Stienen (Bélxica/Belgium).

Nesta imaxe teredes que usar a imaxinación, esta Gaivota escura (Larus fuscus) adulta, leva unha anela plástica, coa seguinte codificación 0;AZ[DHC]↑/0;α, (era algo tímida…). Anelada por Peter Stewart (Reino Unido/UK).

Gaivota cabecinegra (Larus melanocephalus) con anela 0;V[3H8]↓/0;α en plumaxe de Adulto inv. Este exemplar observeino por vez primeira en decembro do ano 2006 nesta mesma praia. Anelado en xuño do ano 2006 en Saintes-Maries-de-la-Mer, Bouches-du-Rhône (Francia/France) por Camille Duponcheel.

Por último este exemplar de Cabecinegra (Larus melanocephalus) de 1º inverno con aneis 0;V[R47U]↓/α;0, este exemplar foi observado na Punta dos Castros, Cangas, Pontevedra. Anelado en xuño deste ano en Barbâtre, Polder de Sebastopol, Vendée (Francia/France) por Camille Duponcheel.

Desprazamento de 0;V[R47U]↓/α;0 dende a súa localidade de anelamento en Francia, ata o lugar de observación en Punta dos Castros, 743 Km. de distancia.

Un saúdo.