A estación de anelamento científico de esforzo constante de “Castrillón” nace para estudar a evolución da comunidade de aves da campiña galega. A estación atópase nunha área rural próxima o casco periurbano do concello de Cangas, Pontevedra.
A área de estudo atópase nunha zona con aproveitamento agropecuario onde predominan os viñedos, mesturados cun bosque de ribeira e carballeiras exiguas, así como zonas de matogueira resultado do paulatino abandono da actividade agrícola.
Planéanse unha serie de obxectivos prioritarios a alcanzar co estudo:
1) Realización dunha mostraxe de anelamento científico polo método de estación de esforzo constante.
2) Aportar datos sobre a fenoloxía (reprodución, muda, migración e invernada) dos paseriformes presentes no lugar.
3) Obter datos sobre a abundancia temporal e unha estima da abundancia de paseriformes que utilizan o espazo.
4) Obter información da biometría, condición física, idade e sexo das aves.
5) Analizar a selección do hábitat e o uso da área polas distintas especies de aves.
6) Estudar a dinámica poboacional, e a evolución das especies de aves da campiña galega a longo prazo.
7) Estudar o impacto do anelamento científico de aves silvestres.
Este último fin de semana realizouse a terceira xornada de anelamento en Castrillón correspondente o mes de agosto.
Un total de 39 aves (9 especies) foron capturadas para a súa marcaxe:
1) Carriza (Troglodytes troglodytes): 1 ave
2) Paporrubio (Erithacus rubecula): 7 aves
3) Merlo (Turdus merula): 3 aves
4) Folosa amarela (Hippolais polyglotta): 2 aves
5) Papuxa cabecinegra (Sylvia melanocephala): 3 aves
6) Papuxa picafollas (Sylvia borin): 1 ave
7) Papuxa das amoras (Sylvia atricapilla): 20 aves
8) Picafollas musical (Phylloscopus trochilus): 1 ave
9) Estreliña riscada (Regulus ignicapilla): 1 ave
Paporrubio (Erithacus rubecula), idade EURING 4 (terminoloxía de determinación da idade segundo o código EURING, neste caso 4 significa ave de idade descoñecida pero que naceu antes do ano actual. Adulto), en plena muda postnupcial.
Paporrubio (Erithacus rubecula), idade EURING 3 (ave de idade coñecida, ave de primeiro ano. Xuvenil), realizando a muda postxuvenil corporal.
Folosa amarela (Hippolais polyglotta), idade EURING 4, especies migradora transahariana, reprodúcese na área de estudo.
Papuxa picafollas (Sylvia borin), idade EURING 3, especie de hábitat forestal e transahariana, en Castrillón observase nos períodos migratorios.
Os aneladores participantes foron: Manolo Alonso Alonso, Sol Enriquez Paredes e Alberto Pastoriza Barreiro (Grupo de anelamento ANDURIÑA).
Un saúdo.
No hay comentarios:
Publicar un comentario